--------------------------------------------------------------------------------
قبل ما تبتدي في عمل المربيات فيه كام نصيحة عايزين نقول لك عليها علشان تاخدي بالك منها وإنت بتعملي المربى علشان تطلع حلوة...
السكر والفواكه
خلّي بالك إن السكر اللي هتعملي بيه المربى يكون نقي مفيهوش شوائب، و كمان الفواكه تكون طازجة.
إناء الطهي
حاولي إنك تستعملي إناء مستدير سميك من الجوانب.
للتقليب
بلاش تستعملي معلقة معدنية للتقليب وحاولي إنك تستبدليها بمعلقة خشب.
على نار هادية
خلّي بالك إنك تذوبي السكر على نار هادئة وتحاولي إنه يدوب على الآخر وده علشان المربى ماتسكرش قبل ما تغلي.
اوعي تنسي
إنك تضيفي عصير الليمون إليه علشان المربى ماتسكرش منك قوي.
أول بأول
احرصي وإنت بتقلبي المربى إنك تشيلي الريم أول بأول وده علشان المربى يكون لونها رايق وصافي.
البرطمان
بالنسبة بقى للبرطمان اللي هتعبي فيه المربى فده لازم يكون نضيف قوى قوي قوي، وجاف تماما من المياه هو والمعلقة اللي هتستخدميها علشان المربى ماتفسدش بسرعة.
أحكمي الغلق
زي ما بيكتبوا على علب المربات لازم تملي البرطمان على الآخر علشان مايكونش فيه حيز يسمح بدخول الهواء، وخلّي بالك إنك تقفلي الغطاء كويس قوي علشان المربى ماتفسدش بسرعة.
اختبار نضج المربى
علشان تعرفي إذا كانت المربى استوت ولا لأ؟ فيه حاجة ممكن تعمليها وهي إنك تاخدي معلقة من المربى وتحطيها على طبق جاف وتسيبيها شوية لغاية ما تبرد. وبعد كده تشوفي إذا كانت سميكة ولا لأ.
في التلاجة
بعد ما تبرد المربى عبيها في البرطمان زي ما اتفقنا واحتفظي بيها في الثلاجة.
بس كده تعالي بقى نشوف طرق عمل أنواع مختلفة من المربى
** مربى التين **
* المقادير *
كيلو تين
كيلو سكر
عصير ليمونه
ربع معلقة صغيرة مسحوق قرنفل
* الطريقة *
1- أحضري التين واغسليه وقطعيه إلى قطع صغيرة وحطيه في طبق صيني على هيئة طبقات وبين كل طبقة وطبقة ضعي سكر.
2- اتركيه فترة تتراوح من 2 إلى 3 ساعات لغاية ما يخرج كمية المياه اللي موجودة فيه.
3- بعد كده حطيه على نار هادئة مع التقليب لغاية ما تلاقي السكر اللي فيه ذاب خالص.
4- بعد كده ضيفي إليه عصير الليمون وسيبيه على النار لغاية ما يتعقد مع إضافة القرنفل المطحون إليه. وزي ما اتفقنا إنك تشيلي الريم أولا بأول.
5- لما تلاقي المربى استوت شيليها من على النار وسيبيها لغاية ما تبرد وبعد كده عبيها في البرطمانات ودخليها التلاجة.
مربى الجزر
المقادير
2 كيلو جزر
2 كيلو سكر
نصف ملعقة شاى من القرفه الناعمه أو القرنفل حسب المزاج
عصير ليمونه
الطريقه
يقشر الجزر ( ويفضل غسيله جيدا بدون تقشير للاحتفاظ بفوائد القشرة )
يقطع حلقات صغيره
يسلق فى ماء يكفى لتغطيته
ينشل من الماء
يضاف للماء ناتج السلق السكر ويترك على النار
يختبر كل فتره باسقاط نقطة من الملعقة حتى نجد النقطة بها مطاطية خفيفه
يضاف عصير الليمونه للمحلول ويترك على النار 5 دقايق
يضاف الجزر المسلوق والقرفه أو القرنفل للمحلول على النار 15 دقيقه
يعبأ فى برطمانات جافة وهو ساخن للتعقيم
يغطى بعد ان يبرد ويوضع فى مكان جاف او بالثلاجه
طريقة عمل مربي المشمش
المقادير:
1 كيلو مشمش,1 كيلو سكر سنترفيش, عصير ليمونة
الطريقة:
* ينزع النوي من المشمش.
* يقطع المشمش بالسكين قطعا صغيرة.
* في طبق صيني او بلوري يوضع المشمش في طبقات متبادلة مع السكر ويترك المقدار6 ـ8 ساعات حتي ويخرج المشمش ماءه
* في إناء عميق يرفع المشمش فوق نار هادئة مع التقليب من حين لآخر حتي يذوب السكر تماما.
* يضاف عصير الليمون ويترك المقدار علي النار هادئة حتي تعقد المربي. ويرفع الريم.
* ترفع المربي من فوق النار وتترك حتي تبرد تماما ثم تعبأ في برطمانات معقمة
* تحفظ داخل الثلاجة او في مكان جاف متجدد الهواء